საბავშვო ოთახის ინტერიერის დიზაინის შერჩევა და შემდგომ მისი განხორციელება განსაკუთრებულად სათუთი და საყურადღებო პროცესია, რადგან საქმე ეხება იმ სივრცეს, სადაც თქვენი პატარა უნდა გაიზარდოს, ჩამოუყალიბდეს უნარები, ემოციური შტრიხები, იმეცადინოს, სრულფასოვნად დაისვენოს, აქ უნდა ითამაშოს საყვარელი თამაშები და საერთოდ აკეთოს ყველა ის ბავშვური საქმეები რაც კომფორტს და სიხარულს მიანიჭებს მას. ამიტომ, ეს მიკრო სამყარო ისე უნდა მოაწყოთ, რომ მაქსიმალურად დაცულობის, სიმყუდროვის და აუცილებლად მხიარული განწყობის შეგრძნებას იწვევდეს მის მფლობელში.
მთავარი ბავშვის ინტერესებია
დიზაინის შერჩევამდე, რა თქმა უნდა, არ უნდა დაგავიწყდეთ თავად ბავშვის ინტერესები, ჰობი და სურვილები (თუ ის უკვე საკმარისად დიდია მათი გამოხატვისთვის). ინტერიერი უნდა შეესაბამებოდეს ბავშვის სურვილებს. შეცდომაა, როცა მშობლები საბავშვო ოთახის დიზაინს არჩევენ მხოლოდ საკუთარი გემოვნების შესაბამისად, შედეგად კი იღებენ ინტერიერს, რომელსაც არაფერი აქვს საერთო ბავშვის მოთხოვნებთან, გემოვნებასთან და სულიერ სამყაროსთან. ეს არის მხოლოდ მშობლების კომფორტის აღქმა და არანაირად არ არის ღირებული ბავშვისთვის. თუ ბავშვი იმდენად მცირეწლოვანია, რომ ჯერ კიდევ არ შეუძლია თავისი აზრის გამოხატვა, მაშინ დროებით ისე მოაწყვეთ ოთახი, რომ ბავშვის ასაკის მომატების შემდეგ, ადვილად შეძლოთ ინტერიერის განახლება უკვე მისი სურვილების გათვალისწინებით.
ოთახის ლოკაცია
სასურველია, ადრეული ასაკიდანვე, ბავშვს ჰქონდეს საკუთარი პირადი სივრცე თუ ამ სივრცეს მშობლების ოთახისგან დამოუკიდებლად გამოყოფთ, გაცილებით კომფორტული იქნება როგორც ბავშვისთვის, ასევე მშობლებისთვისაც. გაითვალისწინეთ, რომ ეს არ უნდა იყოს გამავალი ოთახი. ბავშვის ოთახს აქვს საკუთარი სპეციფიკური მახასიათებლები, რომლებიც გათვალისწინებული უნდა იყოს დიზაინ პროექტის შედგენისას ბავშვის კომფორტისა და მხიარული განწყობის უზრუნველსაყოფად. ოთახი უნდა იყოს საკმარისად ფართო. დიზაინერები რეკომენდაციას იძლევიან ოთახის ზონირებაზე. საუკეთესო ვარიანტია თუ საძინებელი ცალკე იქნება გამოყოფილი სათამაშო კუთხისგან და სამეცადინო ზონისგან. მნიშვნელოვანია, რომ ოთახი კარგად იყოს განათებული ბუნებრივი სინათლით, ეს აუცილებელია როგორც მისი მხიარული განწყობისთვის, ასევე ჯანმრთელობისთვის. ამიტომ სასურველია შეარჩიოთ შენობის ის მხარე, სადაც მზის სხივები ყველაზე დიდხანს ჩერდება.
დაიცავით უსაფრთხოება!
ყველაზე მთავარი, რაც უნდა გაითვალისწინოთ, ბავშვის ოთახის ინტერიერის დიზაინზე მუშაობისას, ეს უსაფრთხოებაა, განსაკუთრებით მაშინ თუ ბავშვი პატარაა. უზრუნველყავით ფანჯრების დაცვა. დაამონტაჟეთ უსაფრთხო საკეტები. ფანჯარაზე გამოიყენეთ დამცავი ბადე. ბავშვს არ უნდა ჰქონდეს კარის საკეტზე წვდომა შიგნიდან. იზრუნეთ, რომ ნათურას ჰქონდეს პლასტმასის ან ისეთი მასალის დამცავი გარსი , რომელიც დაიცავს ნათურას დაზიანებისგან რამე საგნის მოხვედრის შემთხვევაში. ოთახში არ უნდა იყოს მკვეთრი კუთხეები. კედლის დეკორაციის არჩევისას, გაითვალისწინთ ის ფაქტორი, რომ მან უნდა გაუძლოს ყველაფერს: ბავშვების ჰიპერაქტიურობას, დარტყმებს, ბურთების სროლას და ა. შ..