ალბათ შეამჩნევდით, რომ საძიებო სისტემაში „ინტერიერის დიზაინის“ ძებნისას უფრო და უფრო ხშირად გვხვდება ფოტოები, სადაც ოთახის ყველა თუ არა, ერთი კედელი მაინც არის აგურის ან უხეშად დამუშავებული ქვის ეფექტით. ეს ტენდენცია ბოლო რამდენიმე წელია აქტუალურია და დიდი პოპულარობით სარგებლობს.
შესაბამისად ქართულ სარემონტო ბაზარზე გამოკვეთილად გაზრდილია მოთხოვნა აგურის კედლის გამოყენებაზე. მომხმარებლები სარემონტო კომპანიებს უფრო და უფრო ხშირად უკვეთავენ აგურის კედელს, ქვის ან ბეტონის იატაკს, ძველებური ეფექტის ისეთ მილებს, რომლებიც კედლებში აღარაა ჩამალული და ჭერზე დაუფარავად ჩანს. სტილი საკმაოდ უცხოა და შთამბეჭდავი. გამოირჩევა ორიგინალურობით და უდავოდ დიდ შთაბეჭდილებას ახდენს პირველივე დანახვისას.
ამ სტილს ინტერიერის დიზაინში „ლოფტი“ ჰქვია და ძირითადად ქალაქურ სტილს მიაკუთვნებენ. „ლოფტი“ განსაკუთრებული სტილია. მისთვის დამახასიათებელი მკვეთრი და ორიგინალური შტრიხების გამო ადვილია მისი გამორჩევა სხვა უამრავ დიზაინერული სტილისგან. მისი ძირითადი დამახასიათებელი შტრიხებია: ღია სივრცეები, აგურის ან ქვის კედლები, რომლებიც ისეა დამუშავებული, რომ დაუმუშავებლის ეფექტს ქმნის. სივრცეში გამოკიდული სადენები და მილები კი უფრო მეტად უსვამს ხაზს მის ორიგინალურობას.
როგორ ამოვიცნოთ "ლოფტი"
უფრო მარტივად რომ აღიქვათ ლოფტის სრული ხიბლი, წარმოიდგინეთ მიტოვებული ფაბრიკა: უზარმაზარი თაღებით, მასიური ხის კოჭებით, ქვის ან აგურის უხეშად დამუშავებული კედლებით, უბრალო ბეტონის იატაკით და შეუნიღბავი, ჰაერში გამოკიდებული მილებით და სადენებით. უბრალოდ, სამუშაო დაზგების და დანადგარების ნაცვლად წარმოიდგინეთ, რომ ამ სივრცეში განლაგებულია ადამიანის საცხოვრებლისთვის აუცილებელი საგნები, როგორიცაა : დივანი, კარადები, საწოლი, მაგიდა, სკამები და ამ ყველაფერს დაამატეთ სურეალისტური შინაარსის რამდენიმე ფოტო ან ისეთი პოსტერები და პრინტები, რომელიც აგურის კედელს მიესადაგება და სურათიც მზადაა. დიახ, თქვენ მიიღეთ ლოფტის კლასიკური ნიმუში.
სტილი ორიგინალური ადამიანებისთვის
ეს სტილი თავისი არაორდინალურობით იმდენად მკვეთრად განსხვავებულია რომ, ლოფტის სტილში მოწყობილი საცხოვრებელი უკვე თავისთავად მიანიშნებს პატრონის ინდივიდუალიზმზე, კრეატიულობაზე და ხაზს უსვამს მის პრეტენზიას, იყოს სხვებისგან განსხვავებული.
დიზაინი ლოფტის სტილში იმდენად სრულყოფილი და უნივერსალურია, რომ თამამად შეგიძლიათ გამოიყენოთ როგორც სახლისთვის, ასევე მოდური კლუბის ან ისეთი კაფეს გასაფორმებლად, რომელსაც ხელოვანი ხალხი ხშირად სტუმრობს.
